قامت الدنيا ولم تقعد.. لما حدث في فرح كروان مشاكل.

ولمن لا يعرف كروان مشاكل، فهو بلوجر وصاحب تريند ونجم بشار له بالبنان.. بيعمل ألف و700 دولار لكل مليون مشاهدة لفيديوهاته وكلامه المبهم أحيانا، الذى لايخلو من لدغة مميزة.. جعلته شيخ نجوم التريند في بر مصر وما حولها.. والعداد بيعد.

الواد مشاكل الذى لايتعدى سنه أوائل العشرينات علي أقصى تقدير.. لعبها صح وفهم الفولة من بدرى.

ساق الهبل علي الشيطنة. مرة يظهر مع نجمة تريند زيه في ألفاظ وايحاءات خادشة.. كلفته عدة شهور في السجن.. وأهي مصلحة برضه. ومرة يشتم في فلان أو علان.. والتريند ماشى برضه والعداد بيعد. ومرات يسوق الهبل ويضحك الناس وهو بالحقيقة يضحك عليهم .. ما يخسرش برضه.

ولكنه هذه المرة .. فاق الخيال.

الواد عاوز يتجوز، قوم ايه يختار عروسة من بيت المرحوم شعبان عبد الرحيم.. اللي برضه بيحبوا التريند .

يدخل البيت من بابه، عاوز يخطب البنت اللي هى برضه تريند وعاوزة تشتهر وتبقي مغنية.. ماهو بيت العيلة معهد فني لوحده.. هي اللي قالت كده والله.

كروان تجيله فكرة عبقرية ليركب الترند.. الجوازة وحدها مش كفاية، نعمل خناقة وهمية مع عائلة شعبولا. ده أنا اللي بأشهرهم مش هما. وترد العيلة وتهدد بفركشة الجوازة. ويتراجع مشاكل.

مكنش قصدي والله.

يطلع في فيديو قبل الجواز بيوم. ويعزم مصر كلها علي فرحه. ثم يعود ليقول في فيديو لاحق.. محدش ييجي من غير دعوة. أنا جايب بودي كارتات كتير، هتمنع اللي ممعهوش دعوة من الدخول.

ولا يكتفي بذلك بس.. أنا عزمت كل نجوم مصر وحتى ابن الزعيم جاى ويمكن محمد صلاح كمان.

ويجي يوم الفرح .. لنفاجأ بمصر كلها في القاعة.

الواد مش عارف يتنفس من الزحمة. لا بودي كارتات نافع ولا شتايم وتدافع وضرب و...  وتحرش نافع.

الضحايا يتساقطون .. خد عندك.

شبيه عبد الحليم حافظ وملك جمال الشرقية يسخسخ ويقع علي الأرض.

نجمة تريند درجة عاشرة تتعرض للتحرش.

أندر تيكر المصرى بيتهان.

أم كذا وأم كذا نجمات التريند.. بيشتمن في كروان.. ده كان فرح الشوم والعار.

وعيلة شعبولا تصرخ.. أخرجي يا بت الفرح باظ.

الكل عمل اللي عليه والتريند لف مصر كلها.

ولف بلاد كتير بره  برضه.

وأصبحت مصر بين عشية وضحاها.. بلد كروان مشاكل ومن هم علي شاكلته. وأصبحت اهتمامات المصريين الغلابة مركزة في الجوازة اللي باظت والواد اللي راح فطيس وحرقوا عربيته وفلوسه وموبايلاته ضاعت، هى وفلوس العائلة المنكوبة.

كروان مشاكل.. لايمثل مصر طبعا. ولكنه يمثل طبقة كبيرة جدا من مصر الآن.

طبقة أصحاب الفهلوة والمعلمة واخطف واجرى وابجنى تجدنى. وأحلي من التريند مفيش.

طبقة رأت أصحاب المليارات يتصخمون مع صباح كل يوم. وأصحاب المؤهلات والشهادات ينقرضون في كل لحظة.

طبقة رأت أنها لكى تعيش وسط الأكابر في مصر. لابد وأن تأكلها والعة دون أن يقول لها أحد من أين لك هذا.

ولا مانع من دخول الكركون لشهر ولا شهرين.. فالتريند يزيد والرصيد في البنك يتضخم.

طبقة شافت ومحدش قال لها.. أن اللي معاه قرش يساوى قرش. واللي ممعهوش ميلزموش.

لا تلوموا كروان مشاكل.. فقد اجتهد علي اد فهمه .. وركب التريند.

ويا بخت من بات راكب.. وما باتش مركوب.
------------------------------
بقلم: خالد حمزة
[email protected]